Sie war verwandt mit Jacob Bernarts van Rund.
Kind(er):
Catharina | ||||||||||||||||||||||||||||||||||
Jacob Bernarts van Rund | ||||||||||||||||||||||||||||||||||
R50 folio 380 en 380v.
Wij Niclaes Peters van Sutphen, Jan Jans Goyaertss ende Dierick Seberts
Brants, schepenen in de Baronie van Boxtell doen te wetene eenen
iegelijcken, certificerende mits desen ter instantien van Peter Jacobss
van Runde ons naebuer voer de gerechte waerheyt, dat Jacop Bernaerts van
Runde bij Catarina zijne huysvrouwe heeft verweckt ende achtergelaeten
drie wettige kynderen, daervan d'eene is geweest de voirs. Peter Jacobss
zijn zoone, ende twee dochteren, ende daervan dat d'outste is genoempt
Weyndelken, woenende binnen der stadt van 's Hertogenbossche, ende aldaer
gehout zijnde met eender genoempt Peter Adams, smit van zijnen handwerck.
Ende die joncxte genoempt Clara, diewelcke anno XVc drie en tachtentich
ten tijde als graeff Caerle van Mansfelt als veltheer commanderende over
het legere van zijne majesteyt belegeert hadde de stadt van Eyndoven,
gehout is geweest met een duyts capiteyne onder 'tzelve legere genoempt
Hans Nuchteren, diewelcke te dier tijt metten zelven Hans Nuchteren haeren
man van daer uuyten quartiere van Brabant is vertrocken naar Hooch
Duytslant ons wetens noeyt zedert den voirs. jaere 1583 in den quartiere
van Brabant geweest zijnde, niet wetende oyck weder deselve noch in den
leven is ofte niet. Ende alzoe de voirs. Peter Jacobss van Rund,
Weyndelken ende Clara van vader ende moeder zijn geheele broeder ende
zusters, ende malcanderen naeste vrienden ende bloetbewant, datse daeromme
zoe iemant van henlieders geraecte te sterven ende overlijden zonder
wettige geboerten ofte kynderen achter te laeten naer den lantrechte
alhier ende naer conscientie malcanderen behoeren te succederen ende
gerechte erffgenaemen te wesen in allen den goederen bij alsulcke ierste
afflijvige achter te laeten, dat oyck Jan, zoene Peters Adams is een
wettich zoene van denzeven Peteren aen de voirs. Weyndelken zijn wettighe
huysvrouwe geprocreert ende verweckt.
Ende want godelijcken ende behoirlijcken is der waerheyt rechtveerdich
getuych te geven des wittelijcken versocht zijnde. Soe hebben wij scepenen
voirschreven den gemeynen zegell ons scependoms van Boxtell opt spatium
van desen doen drucken, ende onsen secretaris dese daerneffens doen
onderhantekenen. Gegeven opten zevensten dach der maent van junio int jaer
ons heeren duysent zesse hondert ende zeven.
Certificatie voer Peter Jacobs
van Runde cum suis.