Kind(er):
schepenbank Lithoijen
137 Peter zoen wijleneer GOERT PETERSS alle zijne erfgueden die hij nu ter tijdt besittende ende gebruijckende is tot wat plaetsen ende heerlicheden die gelegen moighen wesen, draagt hij op Ghijsbrechten, Jannen, Peteren, Bernden, Lambrechten Janss als man Anne zijnre huisvrouwe, Lambrechten Peterss van Maren als man Cunere zijnre huijsvrouwe ende Arijken wittige kinderen Peters voirs ende Aelken zijnre huijsvrouwe dochter wijleneer Goert Ghijsbrechts tsamen verweckt om die voirs gueden te moigen vercoepen, transporteren, becommeren, belasten, verminderen ende vermeerderen zoe hen dat believen sal, beheltelijck dat Peter voirs zijn leven lanck sal houden ende besitten huijs ende hof metter toebehoirten daer Peter voirs nu ter tijdt op woenende is; voer welcke gueden die voirg. Ghijsbrecht, Jan, Peter, Bernt, Lambrecht Janss, Lambrecht Peterss ende Arijken voirs hebben eendrechtelijck geloeft Peteren honne vader voirs jaerlijcx te betlaen 20 carolus gulden te wetene tot allen vierdel jaers 5 gulden, zoe lange Peters voirs leven sal; ende indien iemandt vande voirs kinderen tot allen vierdel jaers nijet en betaelde zijn aenpart zoe voirs is, soe sal Peter voirs of iemandt van zijnre weghen dies kints gedeelte vande voirs gueden wederom moigen aenveerden ende tselve vercoepen oft laeten daer hem dat believen sal ende zal tselve kindt berooft ende gepriveert wesen vande gueden zijns vaders ende moeders voirs. Item die voirs kinderen sullen jaerlijcx betalen alle die pachten, thijnsen ende renten vuijten voirs gueden gaende ende die afterdighe pachten ombetaelt zijnde zonder scaide haers vaders voirs; item alle andere sculden behalven pachten ende afterstedige pachten die sal Peter voirs ende Jenneken zijn huijsvrouwe selve betalen; item is voerwairdt datmen naeder aflijvicheijt Peters voirs sal nemen 4 ompartijdighe mannen die welcke sullen ordineren vuijtspreken ende vercleeren wat tkindt bijden voirs Peter Goertsz ende Jenneken Willems dochter vander Graft zijnre tegenwoirdiger huijsvrouwe sijnde verwect hebben sal. Testes Cornelis Goertsz ende Claes Janss. Datering: 27-10-1544 [zie scan]
Die angezeigten Daten haben keine Quellen.