Onze ome Teunis
“Va, ie weat toch wè, dät Teunis anders is?” zeag’n mien oma Van Nee dan tegen
mien opa Willem as Teunis zich anders gedreug dan mien opa verwach’n. Teunis
was ok anders as gewoon. Zien geboorte had te lange ‘eduurd en daordeur had e
een afwieking. Zuurstoftekört was der de oorzake van dät e verstandelijk anders was
as gewoon.
Teunis was een ome van mi’j. De oldste breur van mie moe. D’r war’n der een bonke
bi’j ons in de femilie die Teunis heetten. Zo ha’j bi’jveurbeeld ome Teunis-van-tante-
Kaatjen, wülle nuum’ ‘m meesta’ groot-oom-Teunis-van-de-smidderie-je, al zenge
zelf de leste jaoren: “Zegt maer “Olde-oom Teunis”. Ie hebt ter nog wel meer, maer
dät wördt te ingewikkeld veur iederiene bi’j wie ze niet in de parrementasie bint. Maer
waorumme ‘t giet, dät is, dät onze ome Teunis anders was as gewoon.
De legere schoele in Winsum was te mu’jluk veur um en daorumme gonk e as jongie
naor Zwolle naor schoele, naor de B.L.O.-schoele. Ome Teunis preut daor niet zo
vake over, maer soms ko’j wè mèrk’n dät bepaolde zaken hum nog altied dwars
zaten. Toen e zeumtig wörn, vertellen e, -‘t heufd schuuns umhoge en een bettie
rood, de stemme ietwat hie’js-, dät e in Zwolle op schoele op een keer naor de WC
mos. De meester deut of e zien op-‘estöken vinger niet ‘ezeen had. Teunis, brave
ziel as e was, bleef maer met zien vinger in de heugte zitten, tötdät ‘t te late was. Hij
schaam um der zestig jaor later nog veur, maer ok toen zol e nog niet gauw wat
doen as ‘t niet moch..
Verhaal Arie van der Snel
Die angezeigten Daten haben keine Quellen.