Er ist verheiratet mit Frouke ENTENS.
Sie haben geheiratet am 9. Oktober 1574.
Digitaal Oorkondenboek Groningen en Drenthe, cartago.nl, H.A. Farmsum, inv.nr. 0553, reg. 513
29.9.1574
In de ere Godes almachtich Is by mande vrunde Raedt een hillige echtschup beraempt gededinget ende besloten tuschen den Erntfesten unde Erbaren Luerdt Huyngha des Edelen
unde Erntfesten Wolter Huyngha ende Junckfrouw Anna Renghers syner huysfrouwen soene, up de ene, ende der Erbare ende doechsame Juffer Ffrouwke Enthens salige Peter Enthens ende
junckfrouw Bawe Ompteda syner huisfrouwen dochter, up de ander syde in fformen ende manieren hyer naebescreven Inden eersten geven de Erntfeste Wolter Huynga ende Junck, frouw Anna
Rengers horen soene Luyrt Huyngha mede to bodell enen heerdt landes gelegen onder de kloeken to Garnwert Syallema genaempt hondert grasgen groet, ofte so groet ende kleyn
als de selve heerdt by de hoge balcke is gelegen ende nu ter tydt van twe meijeren wordt gebruycket met alle recht ende heerlicheyt daertoe behorende ende up vallende up welcken vorscr.
heerdt landes staen ende sindt upgenomen twe dusent Embder gulden van welcke twe dusent Embder gulden upgemelte Wolter Huynga ende syn leve huysfrouwe Anna Renghers in
den tydt van twe Jaren naestkomende solen ende willen onder verbandt van hore guederen afflossen ende quyt kopen vyffteyn hondert der vorscr. guldens ende solen van de ander
vyffhondert Embder gulden onbelastet wesen ende blyven dewelcke gemelte Luerdt Huynga ende Juffer Ffrouwke Ehthens selffs sullen afflossen ende betalen. Myt vorwarden
dat durende den tydt der twe jaren losse van de vyfteyn hondert gulden by wolgedachten Wolter Huyngha ende vrouw Anna angenomen sullen vorscr. Luerdt Huyngha ende Juffer
Ffrouwke jaerlix upboren ende ontfangen uuth de Wyart tho Helpman een hondert dalers daer voer sye so vole landes mogen gebruken ofte verhuren tot vorscr, hondert dalers
des jaers, Ende sullen den tyt vorscr. oeck to Helpman up de behusinge mogen wonen Ende so veer gedachten Huynga ende vrouw Anna Renghers echteluyden in de voerscr. twe
jaren de vyffthyn hondert Embder gulden niet en losseden sullen gemelte Luyrdt Huynga ende Juffer Ffrouwke blyven int gebruyck ende possess van de verscr, husynge
ende landen tot hondert dalers des jaers ter tydt wolgedachte Huyngha ende vrouw Anna syn huysfrouwe de afflosse hebben vullentogen, ofte anders so vole landes edder guedes in
de stede overgewyset daer Luyrdt Huyngha ende Juffer Ffrowke de vorscr. hondert dalers uut koren ende mogen bekomen Loven oeck Huyngha ende syn leve huysfrouwe des ver
versocht synde den stock to leggen als lantrecht is inden Gherichte van Selwart Hyerentegens sinnen Luyrdt Huyngha ende syn leve vader ende moder ende samptlicke vrunden
myt Juffer Ffrowke Enthens guederen wall to vreden soe als hoer deselve van horen salygen leven vader Peter Ehthens angearvet sinnen, ende hoer voerts an-
starven ende anarven mogen de Juffer Ffrowke lovet van gelyken intobrengen. Noch sindt vorwerden soe Godt almchtich gedachten Luyrdt Huyngha ende Juffer Ffrowke
Ehthens kindt ofte kinderen geve, unde alsdan ene van beyden olderen verstorve soe sullen kindt ofte kinderen des verstorven olders guederen ontfangen myt schade ende
bate bystaende hylick angelecht beholtlyck de lyffgave in weerden daer hyernae van gasecht wort. Storven oeck beyde Olderen ende voert dat kint ofte kinderen daer nae
ofte voer sunder voertan kinderen nae to latene, sall dat guet wederom arven an beyden syden daer dat van uuthgekomen is ende sullen an beyden syden de ene
partye van des anderen lasten renthen ende schulden voer datum deses upgelecht on belastet ende onbeswaert wesen ende blyven. Noch sindt hilixvorwerden dat alle
reppelyke ende tilbaer guederen met schade ende bate sullen wesen halff ende halff uutgenomen behusingen ende dat elck tot synen oft horen lyve behoert, sall eyn ider voer
hem ende synen arven voer uuth genieten ende beholden. Oeck sindt hilixvorwerden soe Luyrdt Huyngha voer Juffer Ffrouwke sunder kindt ofte kinderen naelatende
verstorve, sall gedachte Juffer Ffrouwke uut syn guet genieten vyftich Embder gulden jaerlicker lyfftucht hoer levent lanck ende nyet langer. Storve oeck
Juffer Ffrowke Ehthens voer Luyrdt Huyngha sunder naetolaten kindt ofte kinderen, sail Luyrdt Huyngha jaerlix uuth Juffer Ffrowken guet genieten
dartich embder gulden lyfftucht als vorscr. is. Ende sall de langstlevende Luyrdt Huyngha ofte Juffer Ffrowke Enthens syn ofte hore respective lyfftucht uut des doden
guat mogen manen ende boren, hoe ende waer hem ofte hoer langstlevende des beleven sall. Ten laetsten sindt hilixvorwerden dat gedachte Luyrdt Huynga toe
laetster doet van syn leve vader ende moder den heerdt landes Syallema genoempt, soet hem belevet sall wederom mogen inbrengen ende scheyden ende delen
myt syn ander leve broden ende susteren offte sall den selven heerdt landes mogen beholden ende daermyt van alle andere vader ende moders verstarff ende arffnisse
affgescheyden syn ende blyven Sonder alle argelist In oerkunde ende tot vestenisse deser hilixvorwerden hebben wy Wolter Huynga ende Luyrdt Huyngha
gebroderen an Luyrdt Huynga des brudegoms sydt. Ende wy Johan de Mepsche ende Eyso Jarghes an Juffer Ffrowke Enthens des bruyts sydt elck
onse ingeboren Segell witlicken beneden an desen breeff gehangen ende wy vrouw Anna Renghers ende vrouw Bawe Ompteda hebben elck onse name myt
onse egen handen hyer onder upt spatium getekent. Ghegeven int Jaer onses heren dusent vyffhondert vierundetsoventich den negenundetwintichsten
dach Septembris.
Luert HUINGA | ||||||||||
1574 | ||||||||||
Die angezeigten Daten haben keine Quellen.